السلام عليكم ورحمة الله
كيفكم بنات ؟
موضوع البوست هالأسبوع عن مفضلاتي وأكثر الأشياء اللي شريتها وحبيتها واستفدت منها في 2016
مع أني اشوف اني اتأخرت شوي بس أخذت وقت لحد ما انتقيت بالضبط الأشياء اللي استخدمتها وحبيتها
بسم الله نبدأ
روج ميبيلين
MAYBELLINE 162 FEEL PINK
هذا الروج اللي كان صديقي طول السنة حتى في المناسبات إذا احترت احط أي لون على طول أختاره
درجته 162 FEEL PINK
لونه وردي لكن الهادي مرة بس مو الشاحب
جداً حبيته للاستخدام اليومي أو مشوار صباحي أو حتى للجامعة
ومعروفة ارواج ميبيلين انها ما تسبب جفاف
اخذته من سنتر بوينت دايماً متوفر عندهم وسعره ما اذكر بكم بالضبط بس اللي اعرفه انه مناسب
محدد شفايف ميبيلين
MAYBELLINE Lip Liner 15 PINK
هذا مكمل للروج تقريباً
ونفس لونه
درجته 15 PINK
الحلو فيه ان اللون يطلع بسرعة معاي مو نفس بعض المحددات اللي لازم اضغط عليهم ويالله يطلع اللون
أحياناً اكتفي به بدل الروج
أو استخدمه لتثبيت الروج أحدد به الشفايف واعبيها باللون وبعدها أحط الروج فوقه
ونفس الروج بعد ما يسبب جفاف
وتلاقوه في سنتربوينت أو أي محل مكياج
مزيل مكياج GARNIER
جربته بعدما سمعت عليه مدح وانه بديل لمزيل المكياج Bioderma
قلت أجربه وأحكم بنفسي
وفعلا أخذته وبعد تجربه لقيت مفعولة تماماً نفس بايوديرما بس الفرق انه أرخص وكميته وفيرة أكثر
ينظف بسرعة حتى المكياج المقاوم للماء يشيله
قوامه مائي
خفيف على العين وما يسبب لها تهيج وحرقان ( وهذي ميزة عجبتني لأن ياما وياما اتحسست عيني وأنا انظف الكحلة أو الماسكارا)
وخفيف على البشرة بعد وما يجففها وما يخلي أثر دهني
أستخدمه حتى في الأيام اللي ما استخدم فيه مكياج عشان أنظف بقايا الكريمات قبل ما أغسل وجهي بالغسول
متوفر في أغلب الصيدليات أو السوبرماركت الكبيرة
فرشة Onetech للشعر
أقدر أقول انها افضل فرشة استخدمتها للأن!؟
فوق انها تفك التشابك عن الشعر بسرعة وما اتألم أبد
حتى لو كان الشعر جاف ومعقد تسهل تمشيطه
استغنيت عن الفرش اللي عندي لما اخذتها
والحلو فيها انها عريضة وتنفع للشعر الطويل
أخذتها من نزيه وسعرها في الثلاثينات
المسك الأبيض من عبدالصمد القرشي
أول مرة استخدمه هالسنة
طريقة استخدامي له اني احطه على اماكن النبض بعد الشاور
خلف الأذن - باطن الكوع - الرسغ
أول ما احطه يكون قوي شوي وبعدها يهدأ ويعطي ريحة مررة خفيفة وفريش وهالشي حبيته مررة
صار ادماني الجديد مع العطور
اخذته من عبد الصمد القرشي ربع تولة بـ 50 ريال
بس ما ادري اذا هذا سعره او كان فيه تخفيض
بس عموماً السعر حلو لأنها تكفي من شهر الى شهرين استخدام
مقشر القهوة
هذا المقشر أحب استخدمه لما يخلص من عندي السكراب
وقررت أستمر عليه
طريقته :
قهوة - سكر أبيض أو بني - زيت جوز الهند
نخلطهم بكميات متساوية
ويستخدم في الشاور بعد ما يبلل الجسم بماي ويستخدم بحركات دائرية
الحلو فيه انه يقشر ويرطب في نفس الوقت فينفع لأيام الشتاء
شنطة مايكل كورس
Michael Kors Crossbody
مميزاتها:
حجمها مناسب ( حطيت صورتها جنب آيفون 7 بلس عشان تعرفوا الحجم )
يدخل فيها الجوال بشكل عرضي
وتشيل الأغراض الأساسية
حلوة للطلعات السريعة والمشاوير القصيرة
جلدها مرن وما يبين عليه أي خدوش وسهلة التنظيف
وزنها خفيف
كل هالمميزات خلتها تحتل المرتبة الأولى في الإستخدام من بين الشنط اللي عندي
وفوق هذا لونها اسود يعني عملية أكثر وأكثر
بس عيبها الوحيد واللي ما انتبهت له أول ما اخذتها
ان اللوقو الذهبي اللي على القفل حقها تبين فيه الخدوش بسرعة بس مو مرة واضح
أخذتها قبل سنة وشوي تقريباً من موقع نمشي
وسعرها كان بحدود 600 وشوي
.
.
وهذي كانت أكثر الأشياء اللي استخدمتها وحبيتها في 2016
اتمنى اني عطيتكم نبذة عن منتجات ممكن تستفيدوا منها
تعليقاتكم تسعدني
ونلتقي في بوستات جاية
0 التعليقات:
إرسال تعليق